Enith Brigitha a nase na Kòrsou, 

15 di april 1955 i tabata un landadó profeshonal.

Su karera a kuminsá na e edat di 11 aña i ku su 15 aña, Enith a bai biba Amsterdam ku su mama i kuater ruman hòmber. Na Hulanda el a drenta e grupo di natashon yamá ‘Het Y’.

Su mama (Coby) tabata un enfermera Hulandes i su tata (Nico) tabata un polis yu’i Kòrsou.

KARERA

Aña 1972 pa 1979 e tabata e mihó landadó di koló i di henter Hulanda.

Durante su karera den deporte, Brigitha a yega na un nivel haltu di éksito. Na 1976, Brigitha a kuminsá representá Hulanda na nivel internashonal, i a bira e promé dama di koló ku a representá Hulanda na Olimpiada.  

Na total Enith tin 97 título nashonal riba su nòmber i 11 medaya internashonal ganá.

Despues di su karera, Enith Brigitha a dediká su mes pa promové deporte entre hóben, spesialmente den barionan  i komunidatnan.

KÒRSOU
Na 1989, Enith i su famia a bai Kòrsou bèk pa biba i traha. Enith tin 3 yu muhé; Soraya, Dominique i Amaryllis. Amaryllis a nase na aña 1990 na Kòrsou. 

 Enith a kuminsá su propio lès di natashon i a fungi e periodo ei komo ‘bondscoach’ den region di Antias.

No muchu despues ku su yu muhé Ammaryllis a bai studia Hulanda, Enith a opta di bai na aña 2008 bèk na Hulanda.

El a sigui duna lès na e pisina na Diemen. I tambe a bira instruktor na e mésun grupo di natashon ku e tabata adén.

ZWEMMEN IN DE SCHADUW

Na aña 2017 e outor ‘ Jeannette van Ditzhuijzen’ a skibi e buki yama ‘Zwemmen in de schaduw van doping’. Den e buki aki nos por lesa ku e tabata gana kada un kompetensia, pero asina e muhennan di *DDR partisipá, e tabata pèrdè esakinan i no por a komprondé dikon.

Ta mas despues el a bin haña sa ku nan tabata usa remedi den sekreto, ku tabata yuda nan landa aún mas lihé. Enith mes nunka a hasi uso di esaki. Enith ta konta ku na aña 1976 e medaya ku el a gana e momentu ei ta nifika hopi p’e. Pasó si no tatin uso di remedi ilegal, kisas e por a gana e medaya di oro.

*DDR ta para pa ‘Duitse Democratische Republiek’ i tabata un pais komunista ku a eksistí na aña 1949 te ku 1990 i tabata situá parti ost na Alemania.  

ENITH BRIGITHA FOUNDATION

Enith a lanta su propio fundashon, yamá “Enith Brigitha Foundation”, pa inspirá i guia hóben den e mundu di deporte. Brigitha ta un figura eminente den historia di Kòrsou i Hulanda, i ta un inspirashon pa nos, no solamente komo atleta pero tambe komo un ehèmpèl pa nos komunidat. 

Awor, Brigitha ta sirbi komo simbolo di perseveransia i determinashon pa hende di tur edat i orígen, kende ta persiguí nan soño den deporte òf otro ámbito di bida.

REKONOSEMENTU

Na 2017 a honra i kambia nòmber di pisina SDK i yama esaki ‘Pisina Enith Brigitha.’

Dos luna despues tatin diferente opinion duná dor di diferente persona ku Enith bia tras di bia ta wòrdu lubidá. 

I pa koregí esaki a logra sera pa medio di subsidio un montante di €42.000,- .

Patrick Mezas, un artista di Kòrsou a traha e plan pa bini ku un estatua honrá na Enith Brigitha.

15 di òktober 2022 na Almere, a ortogá un monumentu pa Enith Brigitha, na forma di un estatua, pa rekonosé su éksito i su status komo pionero pa hende di koló den historia di deporte na Hulanda.